D Fasnacht foht für üüs Konfettistampfer jewils am Dsiischti mit üsem Vorfasnachtsaalass ah. Jedes Johr unternähme mir öbbis wo mit üsem neue Motto zämehanget. Das Johr hei mer bir Firma Mawatec dörfe lehre wie me schweisst u blächbiegt. Am Schluss hett när jede vo üüs e schööni Plagette mit 2017 druffe gha wo mer a üses Kostüm hei chönne due.
Nachdäm mir üsi Plagette gschweisst hei, het üses Masketeam d Musigleitermaske präsentiert. Wüu si derfür bekannt si grossi Maskene z mache isch si das Johr per Lastwage cho. So schwär isch d Maske de doch nid gsi, der Ufrtitt isch ne aber meh aus glunge!
D Sabrina Ischi und d Nathalie Schmid hei bi dere Glägeheit no der nöi «Plämpu» zu ihrne je 15 Johr Konfettistampfer becho. Mir gratuliere ihne ou uf däm Wäg nomou härzlech!
D Fasnacht het am Donsti mit der Chesslete und wunderschönem Wätter aagfange. Am Nomitag hei mer s letztemou üses Vampir-Barokkostüm aagleit und bi Sunneschiin uf de Gasse chönne spile.
S Apero im Chicken mit üsne Lari-Fari Kostüm isch für üs wie jedes Johr der Aafang vom Fasnachtsfriti gsi. Nachhär hei mer ufem Märetplatz und im Chicken gspüut und natürlech si mer ou schüsch ir Stadt unterwägs gsi.
Am Sunti hei mer de ändlech s nöie Kostüm dörfe aalegge und im Steampunklook der Umzug loufe. Bir Monsterguggete hei mer, wie jedes Johr, wieder dörfe stuune wie füu Lüt vor der St. Ursestäge platz hei. Mir hei bis spot id Nacht no uf der Gass chönne spile.
Der ruheigst Tag isch für üs immer der Mändi, denn hei mir nur zwöi Uftritte. Näbem Drummgugulalapfiff, wo mir Fasnächtler üs ungerenang Träffe hei mer ou no bim Autersheim Tühringenhaus gspüut um d Fasnacht ou zu ihne chönne z bringe und Merci z säge das mer bi ihne s Depo dörfe haa.
Am Dziisti si mer natürlech wieder bim Umzuug derbi gsi, leider isch schächt Wätter gsi und es het üs gfreut dass trotzdäm so füu lüt si cho luege. Wo miir üs ufe Wäg dür d Stadt gmacht hei ischs aber zum Glück grad troche gsi. Näbm spile uf der Gass si mer ou no im Stadtheater gsi. Der 12i Chlapf isch wie jedes Johr supper gsi, ou wenns het afo rägne. D Liechtershow derzue hett dä speziell Uftritt nomou unterstriche. Leider isch glii nachem 12i Chlapf Uflösig gsi und mir hei üsi Instrumänt jetz wider versorget bis im Summer.
Mir hei e wunderbari Wuche dörfe erläbe und es hett sech wiedermou zeigt wie guet mir Solothurner Fasnächtler s unterenag hei. Mir bedanke üs härzlech bi aune wo si cho zuelose und bi de Gugge wo mit und für üs gspüut hei.
